كنيسة القديسين - المسيح وسيط أم شفيع
كنيسة القديسين (2)
المسيح وسيط أم شفيع؟
-
معتز: نبتدي بأول سؤال في أسئلتك..
-
توماس: أنا أصلاً معنديش مشكله في النقطه ديه تحديداً. ومعتقدش اني في ما
بيننا خلاف عليها. أنا مش معترض على شفاعة المسيح. أنا معترض على شفاعة البشر،
وبالأخص الميتين (أو القديسين).
-
معتز: مش قولنا نصبر وناخد الموضوع خطوه خطوه، بدل ما
انت بتحط أبو قرش على أبو قرشين!! .. على فكره بقى احنا مش متفقين زي ما انت فاهم،
وهاوريك.. انت موافقني ان المسيح وسيط؟
-
توماس: آه طبعاً.. "لنا وسيط واحد بين الله والبشر" (اتي 2: 5)
-
معتز: وكمان "وَلأَجْلِ هذَا هُوَ وَسِيطُ عَهْدٍ
جَدِيدٍ" (عب 9: 15). و "وَإِلَى
وَسِيطِ الْعَهْدِ الْجَدِيدِ، يَسُوعَ" (عب 12: 24).
-
توماس: تمام ..
-
معتز: وانت موافقني ان المسيح شفيع؟
-
توماس: هو في فرق ما بين الوساطة والشفاعة؟
-
معتز: انت رأيك ايه؟
-
توماس: أنا فاهم ان الاتنين واحد؟ انت هتتوسطلي عند مدير (مثلاً)، زي ما
تتشفعلي عنده.
-
معتز: كلامك صح، ولو بنتكلم بالبلدي. وبلغه عاميه. لكن بنتكلم
في لاهوت وسر عظيم زي التجسد، يبقى محتاجين شوية دقه، في الفروق ما بين المصطلحات.
-
توماس: فهمني أكتر. هو في فرق بين الوسيط والشفيع؟
-
معتز: أيوه.. الوسـيط (Mediator وباليوناني μεσιτεύω) هـو شخص محايــد واقف ما بــين طــرفين، بيســاعد
علــى وضــع حــدٍّ لخــلاف ما بينهم. خلّي بالك الوسيط هو محايــد (يعني Neutral) مش طرف في النزاع[1]. واحنا متفقين ان الوسيط
هنا متنطبقش على أي حد غير المسيح وحده. لأنه هو الوحيد اللي كان بيجمع في كيانه
اللاهوت والناسوت معاً في شخصه الإلهي المتجسد. وكمان مكنش عليه خطايا. وبالتالي هو
الوسيط المحايد الوحيد اللي يقدر يصالح العالم (كإنسان) لنفسه (كإاله) (2كو 5: 19)
-
توماس: تمام.. ويفرق ايه المعنى
ده عن شفيع؟
-
معتز: لا.. المعنى مختلف، وإن كان هناك تشابه وترابط. الشفاعة
(Intercession) - زيها زي معاني تانية كتيره في العربي زي المعونة والإضافة
والإقران – هي اني أطلب من أجل حد محتاج حاجه، أو بالنيابه عن احد. وفي 3 كلمات في
اليوناني بتحمل معنى الشفاعه في العهد الجديد. الكلمات هي:
o
باراكليتوس وباراكليتون (παράκλησις, -εως, ἡ) يعني يشفع، يحامي، يحاجج، يعزز، ويعين.
o
وإنتينخاني (ἐντυγχάνει) بمعنى يتوسل، يتضرَّع، يلتمس، يستغيث.
o
برسفيا (πρεσβεία,
ας, ἡ) ومعناها
الأصلي سفارة (ومنها اشتقت كلمة برسفيتيروس أي الشيخ أو قس). يعني بولس الرسول لما
قال "سفير في سلاسل"، استخدم كلمة بريسفيا. ومع مرور الوقت، تطوّر
استخدام الكلمه ليشمل المعنى الشفاعي، أو الطلب لأجل أحد.
-
توماس: يعني كلمة "وسيط" معناها شخص محايــد واقف ما بــين
طــرفين، من غير ما يكون طرف في النزاع. وكلمة "شفيع" معناها يطلب أو
يحامي أو يتوسل من أجل شخص، أو بالنيابة على شخص. صح كده؟
-
معتز: زي الفل.. 😊
-
توماس: ماشي.. ابتديت افهم قصدك. بس مش مجمّع الصورة أوي لسه.
-
معتز: المسيح هو الوسيط. وهو الوسيط الوحيد. للأسباب التالية:
o
هو الوحيد اللي بلا خطيه (مش طرف في النزاع)
o
هو الوحيد اللي بيجمع الطبيعه اللاهوتيه والطبيعه الناسوتيه
(محايد في الوسط بين الطرفين).. متفقين؟
-
توماس: متفقين.
-
معتز: المسيح برضو شفيع، بيحامي عنا (1يو 2: 1) ويصلي لأجلنا
(يو 17)، ويعيننا في تجاربنا (عب 2: 18). متفقين برضو؟
-
توماس: متفقين.
-
معتز: حلو أوي.. مادام فهمنا الفرق ما بين "وسيط"
و"شفيع" يبقى نقدر نفهم انه المسيح الوسيط الوحيد، مش معناها انه الشفيع
الوحيد. وممكن يكون في شفعاء تانيين، والدليل هو الوصية اننا نصلي لأجل بعض "وَصَلُّوا
بَعْضُكُمْ لأَجْلِ بَعْضٍ، لِكَيْ تُشْفَوْا. طَلِبَةُ الْبَارِّ تَقْتَدِرُ
كَثِيرًا فِي فِعْلِهَا." (يع 5: 16)
-
توماس: فهمت قصدك.. وان في فرق بين وسيط وشفيع. وان الوسيط واحد، لكن الشفيع
ممكن يكون أكتر من واجد. بس مش قادر أهضم، ايه لزمة ان انت تصلي لي مادام المسيح
نفسه بيشفع في. والروح القدس المعزي بيعين ضعفي وبيصلي لي.
-
معتز: سؤال حلو وجريء وفي مكانه. والوصيه هنا صريحه (اننا
نصلي لأجل بعض) .. يبقى السؤال بالأكثر لماذا الشفاعه؟ وان كان اقنوم الروح القدس
والابن بيشفعوا لي، بل والآب نفسه يحبكم (يو 16: 27)، يبقى صلواتنا لأجل بعض هي
اللي هتفرق؟
-
توماس: بالظبط.. ده سؤالي..
-
معتز: تمام.. تعالى نعمل كوبايتين شاي، عشان نجاوب على
النقطه التانيه في الموضوع بتاعنا.. لماذا الشفاعة؟ مش المسيح بيشفع لأجلنا؟؟
يتبع ...
[1] القاموس
الموسوعي للعهد الجديد المفردات اللاهوتية يوناني عربي. تأليف فرلين د. فيربروج (ص429
– 430)
Comments